Friday 8 October 2021

15' කල්ලියේ අන්තිම පුරුක. ඉතින් අවසරයි සමු ගන්නට


අහම්බයක් ලෙස යනෙනා ගමනක

අපි හැම මෙහි හමුවෙන්න ඇතී..

අතේ ඇගිලි ලෙස විවිදැති මිනිසුන්

එක හදකින් එක් වෙන්න ඇතී..

අපමණ සැප දුක් කදුලැල් සරදම්

පහුකල මග හමු වෙන්න ඇතී..

ගත කල සය වස සිදු වූ දේ සැම

මතකෙන් කවදත් නොයනු  ඇතී..


වැටෙනා හැම විට කවුරුන් හැමවිට

ඉදගෙන ඔබ සනසන්න ඇතී..

රණ්ඩු දබර විහිලුව තහලුව අග 

කවදත් ප්‍රේමය තියෙන් ඇතී..

කුප්පි දමා පේපර් ගොඩ ගන්නට

කාපු කට්ට "ගුල" දන්නවැතී..

දවස් ගණන් නිදි වරමින් විදි දුක්

"වල"ට ඇහැකි නම් කියනු ඇතී..


ගොඩ වල "L” එක, ජිම් එක හැමතැන

අපේ මතක ගොඩ ගසා ඇතී..

ඒ ඒ තැන් වල අපි හුන් තැන් වල 

අපිත් නැතුව අද පාලු ඇතී..

ආදරෙයෙන් ගෙවු මේ සය වසරේ

හමු උන ආ ගිය ගොඩක් ඇතී..

ඉතින් අහවරයි අපි ගෙවු කාලය

මේ ලෙස සමු ගෙන යනෙනු ඇතී..


- රුචිර වීරකෝන් -

    30.08.2021



සොඳුරු තැන් වල පාලුව



ඔවුනොවුන් බස් මුමුණන

නෙක නෙක මුවින් සැරසුණ..


වසත් කාලය නික්මුණ

නමුදු සැණකෙලි නැති වුණ..


දින සති ගණන් ගත වුණ

අපි නැතුව එහි තනි වුණ..


ප්‍රේමය පිරී ගිය තැන

පාලුව සමග තනි වුණ..


එනතෙක් බලා බැරි තැන

හේමන්තයට පෙර අප සොයන..


දුක දරණු නොහී තැන

රුක් මුදුන් වුවත්  දුක දැනෙන..


හිස්කම දරා බැරි තැන

ඉකියෙන් හැඟුම් ගිලිහුන..


මිලින වී වැටුන වියලුන

තුරු පත් ඔවුහු බිම සිඹින..


- රුචිර වීරකෝන් -

   13.06.2021


සේයාරුව : DetailS




දවස්

 

යාලුවො කොහෙද යන යන තැන උන් හිටියා..

වලේ ගොඩේ තැන් තැන් හැම අපි හිටියා..

හිත තවමත් දුව දුව ගොස් එහි හිටියා..

කාලය අපේ ගෙවි ගෙවි නිමවී හිටියා..


අපේ සුවඳ තව තව ඉතිරිව  හිටියා..

හෝරා ගණන් කිය කිය සෙනෙහෙන් හිටියා..

අවසන් වසර තැවි තැවි ගෙට වී හිටියා..

මතක සුවද හිනැහී  හඬ හඬ හිටියා..


- රුචිර වීරකෝන් -

10.06.2021




නිරෝදායන වාසිටිය

 සති හතරෙ නිවාස අඩස්සි Quarrantine අධ්‍යාපනයට කැම්පස් එකට ගිය මිතුර,


අපි එකට උන් කාලෙ මැවි මැවී පේනවද..

අපි කොහෙද එන්නැද්ද තෙල් බැම්ම අහනවද..

භවනේ ගී ගැයූ හැටි උබෙ සිතේ මැවෙනවද..

ඩෙස් බංකු වල තවම අපෙ සුවද දැනෙනවද..


තුම්මුල්ල පහු වෙද්දී  ඇහැල මල් වැටෙනවද..

වල යටට පිට්ටනියෙ සද්දෙ තව ඇහෙනවද..

L එකේ පෝලිමේ අපි හිටිය මැවෙනවද..

පුංචි බලු පැටව් ටික අපි නැතිව හොයනවද..


ගේට්ටුවෙ කලු ඇන්ටි බොට තවම රවනවද..

තව්තිසාවෙන් යද්දි සුවද තව දැනෙනවද..

බොල්ගොඩට පිටුපාලා ඉර තාම බහිනවද..

ආගියපු තැන් වලම තව පාලු දැනෙනවද..


- රුචිර වීරකෝන් -

15.02.2021